ყოფილი პრეზიდენტის მიხეილ სააკაშვილის დედამ გიული ალასანიამ ისაუბრა და შვილის ბავშვობა გაიხსენა:
"მე მიშიკოს ვეძახი. ყოველთვის ვცდილობდი, რომ მას ყველაფერზე თავისი აზრი ჰქონოდა. სულ მაინტერესებდა, რას მოიფიქრებს, რა აზრის არის, რას იტყვის, როგორ მოიქცევა? ხშირად მესმის, რომ იმპულსურია, სწრაფად იღებს გადაწყვეტილებას. არადა, სხვათა შორის, ძალიან ფრთხილი ბავშვი იყო, ბოლომდე სანამ კარგად არ გაიაზრებდა, ნაბიჯს არ გადადგამდა. ახლაც ტოვებს შთაბეჭდილებას, რომ მოქმედებს ნაჩქარევად, მოუფიქრებლად, მაგრამ განსხვავება, იცით, რა არის? ძალიან სწრაფად ფიქრობს, მაგრამ კარგად გააზრების გარეშე არაფერს აკეთებს.
ჩვენს შორის იყო დიდი მიჯაჭვულობა. მეგობრებივით ყველაფერს ერთად ვაკეთებდით, სპორტი იქნებოდა თუ რა, ყველგან ერთად დავდიოდით. ფაქტობრივად, უმცროსი ძმასავით იყო, ჭკუას მარიგებდა...
ძალიან ადრე დაიწყო გაზეთების კითხვა და ადრე დაიწყო სტრიქონებს შორის კითხვა, უნდობლობა... მშვენივრად ერკვეოდა, რას უნდა ენდოს და რას - არა", - თქვა ალასანიამ გადაცემაში "მხოლოდ ლელასთან".