სოფი ლორენს ქართველი სარძლო ჰყავს, ამის თაობაზე ინფორმაცია "რუსთავი 2“-მა გაავრცელა. ლეგენდარული მსახიობის ვაჟი, კარლო პონტი ზუმბას ფიტნესინსტრუქტორ მარიამ შარმანაშვილზეა შეყვარებული. წყვილის რომანი უკვე თითქმის 2 წელია გრძელდება, ყველაფერი კი სოციალურ ქსელში 2021 წლის 14 მარტს მარიამის ფოტოზე მიწერილი კომპლიმენტით დაიწყო.
კარლო პონტი-უმცროსი საყვარელ ქალს საქართველოში ხშირად აკითხავს. როგორც გაირკვა, გასული წლის ბოლოს, 29 დეკემბერს, ნიაზ დიასამიძის კონცერტსაც დაესწრო თბილისში. ახალ წელს კი დიღმის მასივში შეხვდა.
წყვილი მედიასთან არ საუბრობს. მივა თუ არა ქორწილამდე მათი ურთიერთობა, უცნობია. მარიამს პირველი ქორწინებიდან მცირეწლოვანი ვაჟი ჰყავს. ის შვილთან ერთად ხშირად მოგზაურობს და სოციალურ ქსელში მარიამის ვაჟისა და კარლო პონტის საერთო ფოტოებიც იძებნება.
რაც შეეხება 54 წლის პონტის, ის დაოჯახებული იყო უნგრელ ქალ ანდრეა მეზაროსიზე. მათი ქორწილი 2004 წლის 18 სექტემბერს შედგა. ჰყავთ 2 შვილი - ვიტორიო და ბეატრის ლარა.
კარლო პონტი საქართველოში პირველად 2016 წელს ქართველი მეცო სოპრანოს ნინო სურგულაძის მოწვევით ჩამოვიდა. პონტი მისი თაობის ერთ-ერთ ყველაზე ნიჭიერ დირიჟორად მიიჩნევა. მან ძალიან მოკლე დროში შეძლო საერთაშორისო ავტორიტეტის მოპოვება. მისი მუსიკალური ცხოვრება პარიზში, 8 წლის ასაკში დაიწყო. მარიამი "ინსტაგრამზე" შეყვარებულის ფოტოს აქვეყნებს, რომელზეც კარლო პონტი უწერს:
"ჩემო სულო, ჩემო მეგობარო და ჩემო სიყვარულო... სამუდამოდ და ყოველთვის".
კარლო პონტი უმცროსმა თავის "ფეისბუქგვერდზე" გასული წლის 15 ოქტომბერს გამოაქვეყნა მარიამის ფოტო მინაწერით: "ვგიჟდები ჩემს უდიდეს სიყვარულზე, მარიამ შარმანაშვილზე - ქართველი მერილინ მონრო. საქართველო საუკეთესოა!"