ვეტერანმა ფეხბურთელმა ლადო ბურდულმა, რომელსაც ამჟამად სამწვრთნელო კარიერა აქვს, თათია შარანგიას გადაცემაში "სთორი" გულახდილად ისაუბრა 20 წლის ასაკში გარდაცვლილ მეუღლეზე, რომლისგანაც ორი ვაჟი დარჩა. მაშინ ლადოს სპორტულ კარიერაში ყველაზე მნიშვნელოვანი წლები იყო - იმხანად სპორტსმენმა "ალანიასთან" მოაწერა კონტრაქტს ხელი... რძლის გარდაცვალების შემდეგ, მცირეწლოვანი ბავშვების გაზრდა საკუთარ თავზე სპორსტმენის მშობლებმა აიღეს...
ლადო ბურდული:
"მაშინ ვლადიკავკაზის "ალანიაში" ვთამაშობდი, ეს იყო ჩემი პირველი გასვლა უცხოეთში. მეუღლე რომ გარდაიცვალა, ჩემი შვილები ძალიან პატარები იყვნენ. ჩემმა მშობლებმა სამსახური დატოვეს და ბავშვების გაზრდას მიუძღვნეს თავი. პრაქტიკულად, სამი ძმა ვართ... ისე გაგვზარდეს, ჩემ მშობლებს სამი ბიჭი ჰყავთ. არაჩვეულებრივი ურთიერთობა გვაქვს, ჩემი შვილები ლადოს მეძახიან.
ძალიან რთული პერიოდი იყო, მგონია, რომ ის რომ ცოცხალი ყოფილიყო, უფრო დიდ ფეხბურთს ვითამაშებდი. უმნიშვნელოვანესია, როდესაც ოჯახში გაქვს სიმშვიდე... ზუსტად იმ პერიოდში მოხდა ეს ამბავი, როდესაც კარიერის პიკი მქონდა.
ჩემი მეუღლე 20 წლის გარდაიცვალა... მშობიარობის შემდეგ მოხდა გართულება... ბავშვი ოთხი თვის იყო მაშინ, უფროსი წლინახევრის. ასე არ უნდა მომხდარიყო, ახალგაზრდა ადამიანები ამ ქვეყნიდან არ უნდა მიდიოდნენ, მაგრამ ხდება... ჩემმა მეგობრებმა იციან, რომ ჩემი ტელეფონი არასოდეს ითიშება, სულ მგონია, რომ სადღაც უნდა დავაგვიანო და ვიღაცას რაღაც უჭირს. მეუღლე რომ გარდაიცვალა, არ ვიყავი საქართველოში... მამა რომ გარდაიცვალა, მასთან ათ წამში გავჩნდი, მაგრამ ვერაფერი ვუშველე.
ბოლოს მეუღლე მაშინ ვნახე, როდესაც სოჭში გავფრინდი და გამაცილა. ყველაზე საუკეთესო წლები რომ გაქვს ცხოვრებაში, ბედნიერი ხარ, წარმატებული სპორტსმენი, გაქვს ლამაზი ოჯახი...
ყოფილა დღეები, სასაფლაოზე გამითენებია... ბედნიერი ვარ იმით, რომ ორი უმაგრესი ბიჭი გამიჩინა. პატარა ძალიან მაღალია 2.1 სანტიმეტრია სიმაღლეში... მე 1.84 სმ ვარ და მედი იყო 1.83. ცდილობდა ჩემთან ერთად ქუსლიანი ფეხსაცმელი არ ჩაეცვა. შვილს ვეხუმრები ხოლმე, მგონი, შენი თავი სამშობიაროში შემიცვალეს-მეთქი. კარგი ბიჭები არიან...