გუშინ, ცნობილი ქართველი მომღერალი ინგა ფერაძე ბელგიაში, საავადმყოფოში გარდაიცვალა. ქალბატონი ინგა წლებია ემიგრაციაშია, სადაც მისი ერთადერთი შვილი ანა ფერაძე, მეუღლესთან და ხუთ შვილთან ერთად ცხოვრობს.
მომღერალს საგარეო საქმეთა სამინისტრო საქართველოში გადმოასვენებს. დედის უკანასკნელ გზაზე გაცილება უნდა ანას, მაგრამ მას იმის ფინანსური საშუალება არ აქვს, რომ ბილეთი შეიძინოს, ამისთვის საზოგადოებას დახმარებას სთხოვს.
„დედა ბოლო დროს ცუდად იყო, ორი თვის განმავლობაში ორი ოპერაცია გადაიტანა. ერთი მენჯის ძვლის, ამოვარდნილი ჰქონდა და ჩაუსვეს. ამის შემდეგ ცუდად გახდა, ნაწლავებზე შეექმნა პრობლემა. ექიმების თქმით, აუცილებელი იყო ოპერაცია, მითხრეს, - თუ ოპერაცია არ გავუკეთეთ, გარდაიცვლება და ოპერაციის შემთხვევაში, კიდევ არის პატარა შანსი რომ იცოცხლოსო. დავთანხმდი, რადგან იმედი მქონდა, რომ ცოტა ხანი მაინც იცოცხლებდა. თუმცა ოპერაციის შემდეგ ძალიან დასუსტდა, ხელოვნურ კვებაზე გადაიყვანეს, რამდენიმე დღე იცოცხლა და გუშინ დილას დამირეკეს და მითხრეს, რომ გარდაიცვალა.
ნგას ცხედარს სახელმწიფო ხარჯით გადმოასვენებენ. ძალიან მინდა, რომ დედა უკანასკნელ გზაზე გავაცილო, მაგრამ ფინანსური პრობლემების გამო, ვერ ვახერხებ ჩამოსვლას. ბილეთის ყიდვის შესაძლებლობა რომ მქონდეს, ჩამოვიდოდი.
ნინო ქათამაძესაც ველაპარაკე და მითხრა, - იქნებ ინგას ცხედარი დავწვათ და ისე გადმოვასვენოთო. ვუთხარი, რას მეუბნებით, თქვენ ჩემი გაგიჟება გინდათ-მეთქი?
მე 21 წელია საქართველოში არ ვყოფილვარ. ბევრს არაფერს ვითხოვ, თანხა მჭირდება იმისთვის, რომ ბილეთი ვიყიდო და დედა გამოვაცილო. მანდ რამდენიმე დღე დავრჩები, ბელგიაში მყოფმა ქართველებმა მითხრეს, რომ საქართველოში შეძლებენ მომიგვარონ დასარჩენი ადგილის პრობლემა", - განუცხადა "ამბებს" ინგა ფერაძის შვილმა.